ᱥᱟᱜᱩᱱ ᱦᱮᱢᱨᱚᱢ
᱑. ᱯᱟᱱᱚ
ᱫᱤᱱᱟᱹᱢ ᱫᱤᱱ ᱞᱮᱠᱟ ᱛᱮᱦᱮᱧ ᱦᱚᱸ ᱯᱟᱱᱚ ᱛᱟᱠᱤᱱᱟᱜ ᱨᱚᱜᱚᱲ ᱡᱷᱚᱜᱚᱲ ᱫᱚ ᱮᱛᱚᱦᱚᱵ ᱜᱚᱫ ᱟᱠᱟᱱᱟ ᱾ ᱟᱠᱤᱱ ᱥᱤ-ᱯᱩᱨᱩᱥ ᱜᱮ ᱵᱟᱠᱤᱱ ᱥᱩᱞᱩᱠᱚᱜ ᱠᱟᱱᱟ ᱾ ᱠᱟᱹᱭ ᱫᱚ ᱯᱟᱱᱚ ᱟᱡ ᱡᱟᱶᱟᱭ ᱟᱜ ᱜᱮ᱾ ᱱᱮᱵᱮᱛᱟᱨ ᱫᱚ ᱠᱟᱢᱤ ᱠᱚ ᱫᱮᱭᱟ ᱠᱟᱛᱮ ᱫᱤᱱᱟᱹᱢ ᱦᱤᱞᱚᱜ ᱜᱮ ᱧᱩ ᱵᱩᱞ ᱠᱟᱛᱮ ᱚᱲᱟᱜ ᱮ ᱦᱤᱡᱩᱜ ᱠᱟᱱᱟ ᱾ ᱫᱩᱭᱟᱹᱨ ᱨᱮ ᱛᱤᱸᱜᱩ ᱠᱟᱛᱮ ᱜᱮ ᱯᱟᱱᱚᱭ ᱢᱮᱱ ᱞᱮᱫᱟ -"ᱟᱢ ᱫᱚ ᱯᱟᱹᱣᱨᱟᱹ ᱧᱩ ᱫᱚᱢ ᱵᱟᱜᱤᱭᱟ ᱥᱮ ᱵᱟᱝ ? ᱟᱢ ᱫᱚ ᱧᱩ ᱧᱩ ᱛᱮᱜᱮᱢ ᱞᱚᱦᱚᱢᱚᱜ ᱞᱟᱹᱜᱤᱫ᱾ ᱟᱢ ᱥᱟᱶ ᱫᱚ ᱚᱦᱚᱠᱤᱭᱟᱹᱧ" ᱾
ᱱᱚᱶᱟ ᱠᱟᱛᱷᱟ ᱠᱚᱫᱚ ᱯᱟᱱᱚ ᱧᱟᱛᱟᱛ ᱮᱨᱟ ᱫᱟᱱᱟᱝ ᱠᱷᱚᱱᱮ ᱟᱸᱡᱚᱢ ᱞᱮᱫᱟ ᱾
ᱫᱚᱥᱟᱨ ᱦᱤᱞᱚᱜ ᱥᱮᱛᱟᱜ ᱟᱸᱜᱟ ᱯᱟᱭᱟᱨ ᱨᱮᱜᱮ ᱯᱟᱱᱚ ᱡᱟᱶᱟᱭ ᱫᱚ ᱚᱲᱟᱜ ᱠᱷᱚᱱᱮ ᱳᱰᱳᱝ ᱮᱱᱟ ᱾ ᱥᱮᱛᱟᱜ ᱨᱮ ᱵᱮᱨᱮᱫ ᱠᱟᱛᱮ ᱯᱟᱹᱣᱨᱟᱹ ᱵᱟᱝ ᱧᱩ ᱠᱟᱛᱮ ᱫᱚ ᱵᱟᱭ ᱛᱟᱸᱦᱮ ᱫᱟᱲᱮᱣᱟᱜᱼᱟ᱾ ᱚᱱᱟ ᱧᱮᱞᱛᱮ ᱯᱟᱱᱚ ᱦᱚᱸ ᱨᱟᱜᱤ ᱛᱮ ᱜᱷᱮᱸᱴ ᱢᱚᱴ ᱫᱤᱯᱤᱞ ᱠᱟᱛᱮ ᱫᱷᱟᱸᱣᱲᱟ ᱫᱷᱟᱸᱣᱲᱤ ᱢᱚᱦᱰᱟ ᱮᱱᱟᱭ ᱟᱯᱟ ᱵᱟᱨᱮ ᱚᱲᱟᱜ ᱛᱮ᱾
ᱧᱤᱫᱟᱹ ᱠᱷᱟᱱ ᱜᱮ ᱫᱷᱟᱹᱣ ᱫᱷᱟᱹᱣ ᱥᱟᱨᱟ ᱥᱮᱸᱜᱮᱞ ᱡᱳᱞ ᱮᱱᱟ ᱾ ᱫᱚᱥᱟᱨ ᱦᱤᱞᱚᱜ ᱠᱷᱚᱵᱚᱨ ᱨᱚᱴᱟᱣ ᱮᱱᱟ -
"ᱯᱟᱱᱚ ᱫᱚ ᱵᱟᱝᱢᱟ ᱟᱡ ᱡᱟᱶᱟᱭ ᱫᱟᱠᱟ ᱨᱮ ᱵᱤᱥ ᱢᱮᱥᱟ ᱠᱟᱛᱮᱫ ᱮ ᱡᱚᱢ ᱦᱚᱪᱚ ᱞᱮᱫᱮᱭᱟ!!"
᱒. ᱨᱟᱜᱽᱫᱟ
ᱪᱟᱥᱤ ᱵᱟᱥᱤ ᱚᱲᱟᱜ ᱨᱮᱱ ᱨᱮᱸᱜᱮᱪ ᱦᱚᱯᱚᱱ ᱨᱟᱜᱽᱫᱟ ᱫᱚ ᱟᱰᱤ ᱟᱸᱴ ᱪᱟᱥ ᱠᱟᱢᱤ ᱨᱮᱭ ᱫᱷᱩᱨᱟᱹᱣ ᱟᱠᱟᱱᱟ᱾ ᱛᱟᱞᱟ ᱛᱤᱠᱤᱱ ᱨᱮᱭᱟᱜ ᱥᱤᱛᱩᱝ ᱛᱮ ᱡᱤᱭᱤ ᱦᱚᱸ ᱟᱰᱤ ᱪᱷᱟᱴ ᱯᱟᱴᱟᱣ ᱪᱟᱵᱟ ᱟᱠᱟᱱ ᱛᱟᱭᱟ᱾ ᱥᱩᱨ ᱥᱩᱯᱩᱨ ᱵᱟᱹᱫ ᱵᱟᱹᱭᱦᱟᱹᱲ ᱠᱚᱨᱮ ᱦᱚᱸ ᱦᱚᱲ ᱫᱚ ᱵᱟᱱᱩᱜ ᱠᱚᱣᱟ᱾ ᱢᱤᱫ ᱰᱚᱸᱰᱮᱠ ᱫᱟᱨᱮ ᱩᱢᱩᱞ ᱨᱮ ᱡᱤᱨᱟᱹᱣ ᱨᱮᱭᱟᱜ ᱦᱚᱸ ᱵᱟᱭ ᱢᱚᱱᱮᱭᱮᱫᱟ᱾ ᱩᱭᱦᱟᱹᱨ ᱵᱟᱲᱟᱭᱮᱫᱟᱭ ᱪᱟᱥ ᱠᱟᱢᱤ ᱨᱮᱭᱟᱜ ᱵᱚᱱᱚᱫᱚᱞ ᱟᱨ ᱟᱨᱩ ᱯᱷᱮᱨᱟᱣ ᱠᱚ᱾ ᱥᱚᱥᱱᱚᱜ ᱥᱟᱶᱛᱮ ᱢᱟᱱᱢᱤ ᱠᱚᱣᱟᱜ ᱠᱟᱡᱟᱜ ᱩᱛᱱᱟᱹᱣ ᱦᱩᱭᱩᱜ ᱠᱟᱱ ᱨᱮᱸᱦᱚ, ᱫᱷᱟᱨᱹᱛᱤ ᱪᱮᱛᱟᱱ ᱡᱟᱸᱦᱟᱭ ᱠᱚ ᱱᱟᱦᱟᱪᱟᱨ ᱟᱠᱟᱫᱟ,ᱯᱩᱨᱤᱵᱮᱥ ᱠᱚ ᱫᱩᱥᱟᱹᱣ ᱟᱠᱟᱫᱟ,ᱩᱱᱠᱩ ᱫᱚ ᱡᱮᱢᱚᱱ ᱪᱟᱸᱫᱳ ᱦᱚᱸ ᱟᱞᱚᱭ ᱤᱠᱟᱹ ᱠᱚ ᱢᱟ, ᱱᱚᱶᱟ ᱠᱚᱜᱮᱭ ᱜᱩᱱᱟᱹᱱ ᱚᱜ ᱠᱟᱱ ᱛᱟᱦᱮᱱᱟ᱾
ᱢᱮᱱᱠᱦᱟᱱ,ᱥᱮᱨᱢᱟ ᱨᱮ ᱴᱟᱴᱠᱟ ᱜᱮ ᱦᱚᱭ ᱫᱟᱜ ᱥᱟᱶᱛᱮ ᱦᱮᱸᱫᱮ ᱨᱤᱢᱤᱞ ᱜᱩᱨᱞᱟᱹᱣ ᱮᱱᱟ᱾ ᱟᱪᱠᱟᱜᱮ ᱵᱤᱡᱽᱞᱤ ᱢᱟᱱᱠᱟᱣ ᱥᱟᱶᱛᱮ ᱦᱩᱰᱩᱨ ᱥᱟᱰᱮ ᱟᱸᱡᱚᱢᱮᱱᱟ᱾
ᱵᱟᱹᱭᱦᱟᱹᱲ ᱪᱮᱛᱟᱱ ᱨᱟᱜᱽᱫᱟ ᱫᱚ ᱡᱟᱯᱤᱫ ᱟᱠᱟᱫ ᱞᱮᱠᱟᱭ ᱧᱮᱞᱚᱜ ᱠᱟᱱᱟ᱾
***ᱢᱩᱪᱟᱹᱫ***
No comments:
Post a Comment